चुनाव तिहार के गोठ……..
गांव गांव के शुरू हो गिस तिहार-
प्रदेश म चुनाव के घोषणा जैसे ही होइस से वैसे ही मतदाता मन के जलवा शुरू हो गईस हे….दिन रात गांव गांव म चुनाव के चर्चा सबले जादा चलत हे…कोन ल निपटाना हे अउ कोन ल बनाना हे ऐही सब गोठ बात सबले जादा हावे….जोन जोन रिसा हे ओहु मन ल मनाए के दौर चलत हे आउ जम्मो चुनाव लड़ोईया मन सबला बडे सेवक बन के किंदर होवत हे…खैर चुनाव कहु जीते कहुं हारे लेकिन गांव गवई म चुनावी तिहार जोरदार चलना हे अभी।
कोसीर कति के जिला पंचायत सीट गजमजा गिस ना-
वैसे तो जिला पंचायत सीट 30 से 40 हजार मतदाता वाला सीट रथे अउ हमेशा कहा जाथे कि विधानसभा जाए के रस्ता हर जिला पंचायत से होके ही आथे…विधानसभा जाए के आस म जिला पंचायत लड़ोईया मन के संख्या हमेशा बहुत ज्यादा रईथे, लेकिन कोसीर कति के बात ही अलग हे…ओ क्षेत्र हर विधायक क्षेत्र के नाम से जाना जाथे.. ओ कति ल जेन जीत के आथे ओला विधानसभा टिकट मिले के अउ जीते के संभावना बहुत जादा रथे…ओही सपना ल संजो के इ बखत कोसीर में भगवा पार्टी कति से लडोईया मन गजमजा गिस हावे….फेर हांथी के तो जलवा हमेशा ओ कोती बरकरार रहे हावे…..हाल एैसे हावय कि पार्टी के कन्हु बडे नेता मन ओ कोति प्रचार प्रसार बर भारी झिझकत हावे…आधा दर्जन के आसपास चुनाव लडोईया होऐ खातिर जनता मन के मुड घलो किंदर जावत हे…देखव अब कोन जीतत हे त….
जुझारू, मिलनसार शिक्षित अउ झन पुछ काय काय-
चुनाव के डुगडूगी बाजिस तहां तो मिलनसार जुझारू अउ शिक्षित मन के बाढ़ आ गईए हावे….जेन मन के अपन पड़ोसी मन करा गोठ बात बंद हावय ओहु हर मिलनसार बन के किंदरत हे, जेन हर पांच साल कहुं मेर दिखत नई रहीस घर म घुसर गए रहिस ओहु हर अब जूझारू बन के किंदर होवत हे अउ फेर शिक्षित मन के तो बाते झिन करव…..जनता अब हुसियार हो गिस हावे ओहु हर देखत हावे कि कोन मिलनसार हे अउ कोन जुझारू…
